ასტანაში მიმდინარე EXPO-2017-ზე დღეს საქართველოს ეროვნული დღეა. გამოფენას საქართველოს პრეზიდენტი, დელეგაციის წევრებთან ერთად ესტუმრა. შესრულდა 2 ქვეყნის ეროვნული ჰიმნი, აღიმართა საქართველოსა და ყაზახეთის დროშები. კონცერტი გამართეს ასტანაში სპეციალურად ჩასულმა მომღერლებმა, მათ შორის თამარ გვერდწითელმა, ნანი ბრეგვაძემ და ეკა მამალაძემ. ამასთან, ასტანაში წუთიერი დუმილით პატივი მიაგეს 13 ივნისის ტრაგედიის დროს დაღუპულების ხსოვნას.
EXPO-2017-ში 115 ქვეყანა და 22 საერთაშორისო ორგანიზაცია მონაწილეობს. 3-თვიანი საერთაშორისო გამოფენის მთავარი თემა მომავლის ენერგეტიკაა. საუბარია ენერგიის ალტერნატიული წყაროების განვითარებაზე. ამ თემას ეძღვნება საქართველოს პავილიონიც. გამოფენაზე ასევე წარმოდგენილია საქართველოში წარმოებული პროდუქცია, მათ შორის ღვინო.