როდესაც მიწის საკუთრების საკითხზე ვმსჯელობთ, აქ უნდა მოხდეს კონსტიტუციაში ჩასაწერი ნორმის შესაბამისი ფორმულირება, რომლის მიხედვითაც, ყველა კარი ჩაირაზება საქართველოს ტერიტორიების დაყოფა-დანაწილების და მით უმეტეს, მათი მიტაცების აღსაკვეთად, - ამის შესახებ საპარლამენტო უმრავლესობის წევრმა, გიორგი ვოლსკიმ საზოგადოებრივს სასოფლო-სამეურნეო მიწების უცხო ქვეყნის მოქალაქეებზე გასხვისებასთან დაკავშირებით კონსტიტუციაში ჩასაწერი ნორმის შესახებ საუბრისას განუცხადა.
მისი განმარტებით, საჭიროა ისეთი ფორმულირების ჩამოყალიბება, რომელსაც არ ექნება ე.წ. ხვრელები და ამავე დროს, არ იქნება უცხო განვითარებული დემოკრატიული ქვეყნებისთვის. დეპუტატის განცხადებით, ნორმის საბოლოოდ ჩამოყალიბებამდე, სახელისუფლებო გუნდმა მიიღო გადაწყვეტილება, მიწების გაყიდვასთან დაკავშირებით მორატორიუმის გამოცხადების თაობაზე და ამ საკითხზე მსჯელობა უახლოეს პერიოდში დაიწყება.
როგორც გიორგი ვოლსკიმ აღნიშნა, 16 ივნისს უკვე ცნობილი გახდება ვენეციის კომისიის საბოლოო დასკვნა საკონსტიტუციო ცვლილებებთან დაკავშირებით. მისი განცხადებით, ვენეციის კომისიის შეხედულებები და საერთო-სახალხო განხილვების დროს საზოგადოების მხრიდან გამოთქმული მოსაზრებები შეჯერდება და მათზე საკანონმდებლო ორგანო ერთიანად იმსჯელებს.
„ვენეციის კომისიის დასკვნის წინასწარ შეფასებებთან დაკავშირებით დიდი ვნებათაღელვა იყო საქართველოში, ყველა მხარე შეეცადა ამ თემის პოლიტიკური ასპექტით გამოყენებას. ერთადერთი, ვინც სწორ პოზიციაზე დადგა, უმრავლესობა იყო, „ქართული ოცნება“, რომლის წარმომადგენლებმა ზუსტი და სწორი შეფასებები მისცეს“, - აღნიშნა ვოლსკიმ.
რაც შეეხება ვენეციის კომისიის მხრიდან გამოთქმულ შენიშვნებს, გიორგი ვოლსკის განცხადებით, არის ისეთი, შენიშვნები, რომლებიც გასათვალისწინებელია, მაგრამ ყველაზე მნიშვნელოვანია, რომ ვენეციის კომისია წინგადადგმულ ნაბიჯად აფასებს კონსტიტუციაში შესატან ცვლილებებს.
„მათი შენიშვნები სწორედ ის შენიშვნები და წინადადებებია, რომლებიც მათ ჰქონდათ ჯერ კიდევ 2010 წელს და რომლებიც არ იყო იმ კონსტიტუციაში გათვალისწინებული, რომელიც თავის დროზე მოირგო იმ საზოგადოებამ, რომელიც ახლა ყველაზე ხმამაღალ განცხადებებს აკეთებს ამ საკითხთან მიმართებაში“, - განაცხადა საპარლამენტო უმრავლესობის წევრმა.