კლინიკა „ლანცეტის“ გენერალური დირექტორი ფარმან ჯეირანლი არ გამორიცხავს, რომ ის პოლიტიური მოტივით დააკავეს.
ჯეირანლი ვარაუდობს, რომ აზერბაიჯანის ხელისუფლებამ ოპოზიციურად განწყობილ პირებთან მისი კონტაქტები პოლიტიკურ საქმიანობაში ჩართულობად შეაფასა. ამის შესახებ ფარმან ჯეირანლის ადვოკატმა განაცხადა.
გელა ნიკოლაიშვილის თქმით, მისი დაცვის ქვეშ მყოფს ჰქონდა ინფორმაცია, რომ ერთ-ერთი პროსახელისუფლო აზერბაიჯანული გამოცემა მას ანტისახელმწიფოებრივი ორგანიზაციის დამფინანსებლად და ლიდერად მოიხსენიებდა, თუმცა ასეთი ორგანიზაციის არსებობას, ისევე როგორც პოლიტიკასთან რაიმე კავშირს, ჯეირანლი კატეგორიულად უარყოფს.
ნიკოლაიშვილი ჯეირანლის გუშინ სასჯელაღსრულების დაწესებულებაში პირადად შეხვდა. ადვოკატი ამ თემაზე ორშაბათს პრესკონფერენციის გამართვას გეგმავს.
კლინიკა „ლანცეტის“დირექტორს ფარმან ჯეირანლის თბილისის საქალაქო სასამართლომ პატიმრობა 23 მაისს შეუფარდა. ფარმან ჯეირანლის პაციენტებისთვის დიდი ოდენობით თანხის მოტყუებით დაუფლებას და სიცოცხლის ან ჯანმრთელობისთვის საფრთხის შემქმნელი გარემოების შესახებ ინფორმაციის დამალვას ედავებიან.