კოპტი ქრისტიანების მკვლელობის საპასუხოდ, ეგვიპტის მთავრობამ ლიბიაში შეიარაღებული დაჯგუფებების სამხედრო ბაზებზე საავიაციო დარტყმა განახორციელა. პრეზიდენტმა აბდელ ფატა ალ-სისიმ განაცხადა, რომ ქვეყანა, რომელიც ტერორისტებს აფინანსებს, სამაგალითოდ უნდა დაისაჯოს.

ეგვიპტის შინაგან საქმეთა სამინისტროს ინფორმაციით, შეიარაღებული პირები, რომლებმაც გუშინ ეგვიპტეში, მინიას პროვინციაში ქრისტიანებს ცეცხლი გაუხსნეს, ლიბიაში ფორმირებული შეიარაღებული დაჯგუფების წევრები იყვნენ.

26 მაისს მინიას პროვინციაში შეიარაღებული პირები ქრისტიანი კოპტების ორ ავტობუსს თავს დაესხნენ, რის შედეგადაც 29 ადამიანი დაიღუპა, 24 კი დაშავდა. დაშავებულებს შორის ორი მცირეწლოვანია.

ალ-აზარის მეჩეთის იმამმა მომხდარი დაგმო და ქრისტიანებს მიუსამძიმრა.

„ეგვიპტის მთელი მოსახლეობა, განურჩევლად აღმსარებლობისა, ტერორიზმის წინააღმდეგ უნდა გაერთიანდეს.“ - განაცხადა იმამმა აჰმედ ალ ტაიებმა.

მომხდარზე პასუხისმგებლობა არცერთ ტერორისტულ დაჯგუფებას არ აუღია. ბოლო თვეების განმავლობაში, ეგვიპტეში თვითგამოცხადებული ისლამური სახელმწიფოს წევრებმა 70-მდე ქრისტიანი მოკლეს.



წყარო: Euronews