პარლამენტის დიასპორის საკითხთა კომიტეტის თავმჯდომარის პირველი მოადგილე სალომე ზურაბიშვილი კატეგორიული წინააღმდეგია, რომ მცხეთასა და ლევილს შორის დაძმობილების მემორანდუმს ხელი მოეწეროს.
კომიტეტის დღევანდელ სხდომაზე, საგარეო საქმეთა მინისტრის მოადგილემ, ზვიად გონაძემ აღნიშნა, რომ ლევილსა და მცხეთას შორის დაძმობილების მიზნით, მემორანდუმს ხელი მოეწერება.
გონაძეს ზურაბიშვილი გამოეხმაურა და ფაქტი გააპროტესტა.
"ეს სრულიად შემაშფოთებელია. არ შეიძლება, მცხეთასა და ლევილს შორის იყოს დაძმობილების პროექტი გაფორმდეს. არ ვიცი, იყავით თუ არა ლევილში, მაგრამ მიმაჩნია, რომ ეს სრულიად წარმოუდგენელია, რადგან ეს არის ერთ-ერთი მიყრუებული სოფელი პარიზის გარშემო. არ შეიძლება, ჩვენ წარმოვიდგინოთ, რომ ლევილი დაძმობილებული იყოს მცხეთასთან, რომელსაც სულ სხვა დატვირთვა აქვს. ლევილი ის ადგილია, სადაც შემთხვევით საქართველოს ემიგრაციის იმ დროინდელი ადგილსამყოფელი დაარსდა, სადაც მათი ისტორიის ნაწილი დამკვიდრდა. იქ არც ერთი ღირსშესანიშნავი მოვლენა არ მომხდარა, რომელიც საქართველოს ისტორიაში უნდა დარჩეს და ეს მხოლოდ და მხოლოდ მცხეთის მნიშვნელობის დაქვეითებაა. ამიტომ, კატეგორიულ წინააღმდეგობას გამოვთქვამ", - განაცხადა ზურაბიშვილმა.