აუდიტის სამსახურის ხელმძღვანელი ყოფილი მთავარი პროკურორის ბრალდებებს უსაფუძვლოდ და ცინიკურად მიიჩნევს.
ლაშა თორდია ადვოკატებს კონტრბრალდებას უყენებს და მოწმეებზე ზეწოლაში კვლავ ოთარ ფარცხალაძის მხარეს ადანაშაულებს და მუხლის გადაკვალიფიცირებას ითხოვს.
თორდია მიიჩნევს, რომ შინაგან საქმეთა სამინისტრო ჩართულია მტკიცებულებების გადამალვაში. რაც შეეხება დასკვნას, რომელიც ფარცხალაძესა და მერიას შორის გაფორმებულ ხელშეკრულებას ეხება, აუდიტის სამსახური ამ დოკუმენტს მომავალ კვირას გამოაქვეყნებს.
ეს განცხადებები თორდიამ ფარცხალაძის ადვოკატების ბრალდებების საპასუხოდ გააკეთა.
ყოფილი მთავარი პროკურორის დაცვის მხარე ამბობს, რომ თორდია მოწმეებზე ზეწოლას ახორციელებს და ისინი თვითმხილველების გამოკითხვას ვერ ახერხებენ.
რაც შეეხება მუხლის გადაკვალიფიცირებას, ადვოკატები ამბობენ, რომ გენერალური აუდიტორი არ არის უმაღლესი პოლიტიკური თანამდებობის პირი და, შესაბამისად, ცემის მუხლით დაწყებული გამოძიება ვერ შეიცვლება.
საკითხს კიდევ ერთხელ გამოეხმაურა სახალხო დამცველიც.