პრეზიდენტის არჩევის წესის გარდა, უთანხმოების თემად რჩება კონსტიტუციაში შესატანი სხვა საარჩევნო საკითხებიც.
საკონსტიტუციო ცვლილებების საჯარო განხილვა ამჯერად გორში მოეწყო. შეხვედრაზე მყოფმა პრეზიდენტმა გადაუნაწილებელი მანდატების პირველ ადგილზე გასული პარტიისთვის მიკუთვნება არასამართლიანად შეაფასა და თქვა, რომ მსგავსი რამ ძლიერმა პარტიამ არ უნდა იკადროს.
მანდატების, ბარიერის შენარჩუნების და ბლოკების აკრძალვის გამო, მწვავე განცხადებები გააკეთეს ოპოზიციონერმა ლიდერებმაც.
განსაკუთრებით მწვავე აღმოჩნდა სერგო რატიანის გამოსვლა, რასაც დარბაზში ხმაური მოჰყვა.
საორგანიზაციო კომისიის მიმართ შენიშვნა გამოთქვა შეხვედრაზე მყოფმა მოქალაქემაც, რომელმაც ხელისუფლება მხარდამჭერების მობილიზებაში დაადანაშაულა.
ირაკლი კობახიძემ ბრალდება კატეგორიულად უარყო და ხაზი გაუსვა, რომ საჯარო განხილვაში მონაწილეობა ნებისმიერ მსურველს შეუძლია.