დიდი ბრიტანეთისა და ჩრდილოეთ ირლანდიის გაერთიანებული სამეფოს შეიარაღებული ძალების ქვეითთა მომზადების ცენტრის პირველი საწვრთნელი ბატალიონის სამხედრო მოსამსახურეების სტუმრობა საქართველოში დასრულდა. ბრიტანელების ვიზიტის მიზანი, ორი ქვეყნის სამხედრო მოსამსახურეებს შორის ავღანეთში, ჰელმანდის პროვინციაში ჩამოყალიბებული მეგობრული ურთიერთობის გაღრმავება იყო.
ვიზიტის დასასრულს ბრიტანელი მორაგბეები გორში დავით აღმაშენებლის სახელობის საქართველოს ეროვნულ თავდაცვის აკადემიას ესტუმრნენ. აკადემიის ადმინისტრაციის უფროსმა, ვიცე-პოლკოვნიკმა კონსტანტინე პეტრიაშვილმა სტუმრებს აკადემიის ინფრასტრუქტურა დაათვალიერებინა და უმაღლესი სამხედრო სასწავლებლის შესახებ პრეზენტაცია წარუდგინა.
გორში სტუმრობისას სარაგბო მოედანზე საქართველოს შეიარაღებული ძალების სარაგბო ნაკრებთან მორიგი ამხანაგური მატჩიც გამართეს. თამაში საქართველოს შეიარაღებული ძალების სარაგბო ნაკრების გამარჯვებით, ანგარიშით 33:10 დასრულდა.
ბრიტანელი სამხედრო მორაგბეები საქართველოში 8-დღიანი ვიზიტით იმყოფებოდნენ. სტუმრებმა ქართველ სამხედრო მოსამსახურეებთან პირველი შეხვედრა ბათუმში, სარაგაბო სტადიონზე გამართეს, რომელიც მასპინძლების გამარჯვებით, ანგარიშით 22-10 დასრულდა. მანამდე კი, საქართველოს შეიარაღებული ძალების სარაგბო ნაკრებ გუნდთან ერთობლივი ვარჯიშები თბილისში მიხეილ მესხის სახელობის სტადიონზე გამართეს.