გარემოსა და ბუნებრივი რესურსების დაცვის მინისტრის მოადგილემ მაია ბითაძემ სასტუმრო “Gallery Palace” - ში, EaP GREEN პროგრამის გარემოზე ზემოქმედების შეფასებისა (გზშ) და სტრატეგიული გარემოსდაცვითი შეფასების (სგშ) კომპონენტის ფარგლებში ჩატარებული დასკვნითი ღონისძიება გახსნა. შეხვედრაზე გარემოზე ზემოქმედების შეფასებისა და სტრატეგიული გარემოსდაცვითი შეფასების განხორციელებისათვის საჭირო პრაქტიკულ ნაბიჯებსა და მექანიზმებზე იმსჯელეს. ღონისძიებაზე ასევე განხილული იქნა ეფექტიანი სგშ სისტემის საკვანძო საკითხები, არსებული საუკეთესო პრაქტიკა და საერთაშორისო გამოცდილება, ,,გარემოსდაცვითი შეფასების კოდექსით“ გათვალისწინებული ახალი რეგულაციები და სგშ-ის განხორციელებაზე პასუხისმგებელი უწყებების წინაშე არსებული გამოწვევები და საჭიროებები. პროექტი ევროკავშირის ფინანსური მხარდაჭერითა და გაეროს ევროპის ეკონომიკური კომისიის (UNECE) ტექნიკური დახმარებით მიმდინარეობს და მიზნად ისახავს სრულყოფილი გზშ-ისა და სგშ-ის სისტემის ჩამოყალიბებას. ღონისძიება ორგანიზებულია EaP GREEN პროგრამის ფარგლებში საქართველოს გარემოსა და ბუნებრივი რესურსების დაცვის სამინისტროს მიერ გაეროს ევროპის ეკონომიკურ კომისიასა (UNECE) და ‘Georgia’s Environmental Outlook’ (GEO)-თან თანამშრომლობით.