მზიურში მდებარე საჩოგბურთო კორტებს ლეგენდარული ქართველი მოთამაშის, ალექსანდრე მეტრეველის სახელი ეწოდა.

თბილისის საკრებულომ ეს გადაწყვეტილება სპორტისა და ახალგაზრდობის სამინისტროსთან არსებულ მრჩეველთა საბჭოს რჩევით მიიღო. ამ მოვლენასთან დაკავშირებით, კორტებზე სიმბოლური დაფა გაიხსნა.

საზეიმო ცერემონიალს სპორტის სამინისტროს ხელმძღვანელები, ჩოგბურთის ფედერაციის პრეზიდენტი და სპეციალურად ამ დღისთვის ჩამოსული ალექსანდრე მეტრეველიც დაესწრო.

მეტრეველი, თითქმის 20 წლის განმავლობაში, საბჭოთა კავშირის ნომერ პირველი ჩოგბურთელი გახლდათ. მას საკავშირო ჩემპიონატი 12-ჯერ აქვს მოგებული.

დიდი სლემის ტურნირებზე კი საუკეთესო შედეგი 1973 წელს ჰქონდა, როდესაც უიმბლდონის შეჯიბრის ფინალში ითამაშა.