ქვეყნის მთავარ კანონში მოქალაქეობასთან დაკავშირებული ჩანაწერიც იცვლება. პროექტის მიხედვით, უცხო ქვეყნის მოქალაქეობის მიღება საქართველოს მოქალაქეობის ავტომატურად დაკარგვას აღარ გამოიწვევს.

ეს იყო დამოუკიდებელი დეპუტატის-სალომე ზურაბიშვილის ინიციატივა, რომელიც, აზრთა სხვადასხვაობის მიუხედავად, კომისიამ გაიზიარა.

ორმაგი მოქალაქეობა ქვეყანაში დამოუკიდებლობის დღიდან აკრძალულია. გამონაკლისია მხოლოდ ის შემთხვევები, როდესაც პრეზიდენტი, კონკრეტულ პირს გარკვეული დამსახურებების ან სახელმწიფო ინტერესების გამო, მსგავს პრივილეგიას ანიჭებს.