69-დან საკონსტიტუციო კომისიაში ამ დროისთვის 55 წევრი რჩება. ბოიკოტის რეჟიმი გრძელდება. კომისიას ამჯერად ევროპული საქართველო და თავისუფალი დემოკრატები გაემიჯნენ.

გასვლით იმუქრება ლეიბორისტული პარტიაც, რომელიც ამ დროისთვის კომისიაში ერთადერთი ოპოზიციური ძალაა. ნათელაშვილის გუნდი საკუთარი მოთხოვნების შესასრულებლად ხელისუფლებას ულტიმატუმს უყენებს და ორდღიან ვადას აძლევს. სწორედ ორ დღეში იგეგმება ცვლილებების საბოლოო პროექტის კენჭისყრა, რომელსაც არასამთავრობო ორგანიზაციებიც დაესწრებიან.

მესამე სექტორი რამდენიმე ცვლილებას პოზიტიურად აფასებს, თუმცა საარჩევნო საკითხებზე არსებული უთანხმოების გამო, პროექტს, შესაძლოა, მხარი არ დაუჭირონ.