საღამოს 23 საათიდან 16 აპრილის დილის 4 საათამდე მგზავრებს უფასოდ მოემსახურება თბილისის მეტროპოლიტენი.

რაც შეეხება ორშაბათს, 17 აპრილს სასაფლაოების მიმართულებით მუნიციპალური ტრანსპორტი ასევე უფასოდ მოემსახურება მგზავრებს.

მარშრუტების შესახებ კი განცხადებას შინაგან საქმეთა სამინისტრო ავრცელებს. სასაფლაოებთან მისასვლელ გზებზე გარკვეული შეზღუდვები დაწესდება.

უწყების ცნობით, საბურთალოს, კუკიის, მუხათგვერდის და თბილისის ზღვის სასაფლაოების მიმართულებით ავტომანქანები შემდეგი მარშრუტებით იმოძრავებენ - საბურთალოს სასაფლაოსთან მისვლა შესაძლებელი იქნება ვაჟა-ფშაველას გამზირიდან სანდრო ეულის და უნივერსიტეტის ქუჩების გავლით. სასაფლაოს ტერიტორიას ავტომანქანები უნივერსიტეტის ქუჩით, თამარაშვილის ქუჩის მიმართულებით დატოვებენ.

კუკიის სასაფლაოს მიმართულებით მოძრაობა შესაძლებელი იქნება საბჭოს მოედნიდან, ნორიოს აღმართის და მამარდაშვილის ქუჩის გავლით. სასაფლაოს ტერიტორიას ავტომანქანები ცაიშის, ქვალონის, აბაშიძის და 9 ძმის ქუჩებით დატოვებენ.

მუხათგვერდის სასაფლაოსკენ ავტომანქანებისთვის მოძრაობა იქნება წრიული - აღმაშენებლის ხეივნიდან გიორგი ბრწყინვალეს ქუჩის გავლით. თბილისის ზღვის სასაფლაოს მიმართულებით კი მანქანებისთვის მოძრაობა ნებადართული იქნება ხუდადოვის და ანაპის დივიზიის ქუჩებით, თემქის მხრიდან.

სასაფლაოდან წამოსვლა შესაძლებელი იქნება მუხრანის და ხუდადოვის ქუჩებით. საზოგადოებრივი ტრანსპორტი სასაფლაოებთან მიმოსვლისთვის ამავე მარშრუტებით იმოძრავებს.