სირიის პრეზიდენტი ბაშარ ასადი 100%-იან ფაბრიკაციას უწოდებს ინფორმაციას, რომლის თანახმად, მისმა რეჟიმმა ქიმიური თავდასხმა განახორციელა.

სააგენტო „ფრანს პრესისათვის“ მიცემულ ექსკლუზიურ ინტერვიუში ასადი აცხადებს, რომ მისმა მთავრობამ ქიმიური იარაღის სრული მარაგი 2013 წელს დათმო.

„არ გაცემულა თავდასხმის არანაირი ბრძანება. ჩვენ საკუთარი არსენალი რამდენიმე წლის წინ დავთმეთ. რომც გვქონოდა [ქიმიური იარაღი], არ გამოვიყენებდით“, - განუცხადა AFP-ს ასადმა.

მიუხედავად ამისა, შეერთებულ შტატებს, ჯანდაცვის მსოფლიო ორგანიზაციასა და ქიმიური იარაღის ინსპექტორებს ასადის რეჟიმის განცხადებების არ სჯერათ.

4 აპრილს მომხდარმა სავარაუდო ქიმიურმა თავდასხმამ 80-ზე მეტი ადამიანი იმსხვერპლა.