თქვენ გაქვთ მნიშვნელოვანი ბერკეტი, ეს არის ქართველი ხალხის მიერ თქვენთვის მოცემული ნდობის მანდატი და თუ თქვენ გამოიჩენთ პოლიტიკურ პასუხისმგებლობას და თუ თქვენ გამოიჩენთ პოლიტიკურ ფხას, მე გარწმუნებთ, რომ თქვენ გაქვთ გაცილებით მეტი შესაძლებლობები, იმოქმედოთ არა მარტო კანონით განსაზღვრულ მანდატით, არამედ იმოქმედოთ ქართველი ხალხის სახელით, - ასე მიმართა პარლამენტის ფრაქცია „მოძრაობა თავისუფლებისთვის - რეგიონების“ წარმომადგენელმა აკაკი ბობოხიძემ გიორგი მარგველაშვილს.

როგორც აკაკი ბობოხიძემ პრეზიდენტის ყოველწლიური მოხსენების შეფასებისას აღნიშნა, პრეზიდენტი არის ერთადერთი ადამიანი, რომელსაც მთელი ქვეყნის მასშტაბით აქვს ლეგიტიმაცია.

„გედი ფოფხაძემ გააკეთა განცხადება, რომ ბოდიში უნდა მოუხადონ ქართველ ხალხს გიორგი მარგველაშვილის არჩევის გამო. მინდა, დავამშვიდო ბატონი გედი, ეს არის ერთადერთი შეცდომა, რაც თქვენდაუნებურად მოგივიდათ შეცდომა და რომელიც არ არის დამაზიანებელი ჩვენი ქვეყნისთვის. ეს ის თემაა, სადაც თქვენ ბოდიში ყველაზე ნაკლებად გაქვთ მოსახდელი. მაგრამ თვითონ დამოკიდებულება, რომ პრეზიდენტ მარგველაშვილის გამო ბოდიში უნდა მოუხადოთ მთელ ქვეყანას, ძალიან ბევრ რამეზე მეტყველებს, მეტყველებს თქვენს ღირებულებით სისტემაზე. რატომ არის მარგველაშვილის გამო ბოდიში მოსახდელი თქვენი ლოგიკით, რატომ არის პრეზიდენტი მარგველაშვილი მოღალატე თქვენი ლოგიკით, მხოლოდ ერთი მიზეზის გამო, დავესესხები იმ ბრძენ კაცს, რომელმაც ბრძანა, რომ მარგველაშვილმა ხასიათი გამოავლინა და არ გახდა ერთი კაცის ყურმოჭრილი მონა“, - განაცხადა აკაკი ბობოხიძემ.

მისივე თქმით, მმართველ გუნდს სურდა, რომ პრეზიდენტი ერთი კაცის მსახური ყოფილიყო და ეს არ გამოუვიდა.

„თქვენი პრიორიტეტები ძალიან კარგად ჩანს, თურმე ერთი მაცის მსახურებაა მთავარი და თურმე პრეზიდენტ მარგველაშვილს სთავაზობდით ერთი კაცის მოსამსახურედ და არა ქვეყნის პრეზიდენტად. აქედან გამომდინარე, კარგად ჩანს ის როლი, რა როლს აკისრებთ თქვენ თავსაც. მინდა, იმ ადამიანების ტვინში ჩამახედა, ვინც ფიქრობს, რომ ერთი კაცის მსახურება უფრო მნიშვნელოვანია, ვიდრე ქვეყნის მსახურება.​ბატონო პრეზიდენტო, მინდა, რომ მოგმართოთ თქვენ ხართ ერთადერთი კაცი, რომელსაც აქვს მთელი ქვეყნის მასშტაბით ლეგიტიმაცია და თქვენი გამოსვლები არ არის საკმარისი პოზიციის დასაფიქსირებლად. თქვენ გაქვთ მნიშვნელოვანი ბერკეტი, ეს არის ქართველი ხალხის მიერ თქვენთვის მოცემული ნდობის მანდატი და თუ თქვენ გამოიჩენთ პოლიტიკურ პასუხისმგებლობას და თუ თქვენ გამოიჩენთ პოლიტიკურ ფხას, მე გარწმუნებთ, რომ თქვენ გაქვთ გაცილებით მეტი შესაძლებლობები, იმოქმედოთ არა მარტო კანონით განსაზღვრული მანდატით, არამედ იმოქმედოთ ქართველი ხალხის სახელით. ამ ხელისუფლებაზე მშვიდად ყურება და გაგახსენებთ ვაჟა-ფშაველას სიტყვებს, „ბილწთ არ შევეკვრით ზავითა“, დაზავება ამ ხელისუფლებასთან, დამორჩილება ამ ხელისუფლებასთან იგივე შეკვრაა და ისეთივე დამღუპველია ქვეყნისთვის, როგორც ნებისმიერ უცხო ძალასთან შეკვრა“, - განაცხადა ბობოხიძემ.