საქართველოსთვის ვიზალიბერალიზაციის მინიჭება ევროპის მოედანზე საზეიმო გალა კონცერტით აღინიშნა.
საღამო ქართველი შემსრულებლების მიერ ევროკავშირის ჰიმნის შესრულებით გაიხსნა, რის შემდეგაც ანსამბლ “ერისიონის” მოცეკვავეებმა სცენაზე ევროპის იმ ქვეყნების დროშები გამოიტანეს, სადაც დღეიდან საქართველოს მოქალაქეები უვიზოდ შეძლებენ გადაადგილებას.
კონცერტს საქართველოს პრემიერმინისტრი გიორგი კვირიკაშვილი, პარლამენტის თავმჯდომარე და დედაქალაქის მთავრობის წარმომადგენლები ესწრებოდნენ.
გალა-კონცერტზე "ევროვიზია 2017-ის" ქართველმა მონაწილემ თამარ გაჩეჩილაძემ საკონკურსო სიმღერის განახლებული ვერსია პირველად შეასრულა. შესრულდა საქართველოს ჰიმნი. კონცერტი სადღესასწაულო ფოიერვერკით დასრულდა.
საზეიმო ღონისძიება საზოგადოებრივი მაუწყებლის პირდაპირ ეთერში გადაიცემოდა.