ცხოველთა უფლებების დამცველი ორგანიზაცია ქუთაისში ორი დღის წინ გახსნილ ცხოველთა თავშესაფარს ბრალდებებს უყენებს. როგორც არასამთავრობო ორგანიზაციის წარმომადგენლებმა მედიას განუცხადეს, მათ მოიპოვეს დოკუმენტაცია, რომლითაც ირკვევა, რომ მუნიციპალურ თავშესაფარში მაწანწალა ძაღლების დახოცვას აპირებენ.
არასამთავრობოების განცხადებით, მუნიციპალურმა თავშესაფარში ცხოველებისთვის ოპერაციების გაკეთებას ანესთეზიის გარეშე აპირებენ, რადგან შეძენილი აქვთ არა სანარკოზე საშუალებები, არამედ ისეთი პრეპარატები, რომელიც ცხოველს მხოლოდ ადუნებს.
ამასთან, შეძენილია სპეციალური მარილი, რომელიც, მათი თქმით, ცხოველების ევთანაზიისთვის გამოიყენება.
არასამთავრობოების ბრალდებებს უკვე უპასუხეს ააიპ „სპეციალურ სერვისებში“. როგორც ორგანიზაციის ხელმძღვანელმა გელა გაგუამ საზოგადოებრივს განუცხადა, ზემოაღნიშნული ბრალდებები აბსურდულია. მისი მტკიცებით, ცხოველთა თავშესაფრისთვის საჭირო სანარკოზე საშუალებებიცაა შეძენილი. ხოლო, რაც შეხება მარილს, ის ქუთაისში აღმოჩენილი პირუტყვისთვისაა შეძენილი, რომელთაც სპეციალური სამსახურები ქალაქის ტერიტორიაზე აღმოჩენის შემთხვევაში სწორედ ამ თავშესაფარში მიიყვანენ.