„გაფართოებისა და სამეზობლო პოლიტიკის საკითხებში ევროკომისრის იოჰანეს ჰანის და საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელის ფედერიკა მოგერინის არაშორსმჭვრეტელ განცხადებებს თურქეთისთვის არანაირი მნიშვნელობა არ აქვს“, - ნათქვამია თურქეთის საგარეო საქმეთა სამინისტროს განცხადებაში.
განცხადებაში ასევე წერია, რომ ევროკავშირმა მტკიცე პოზიცია უნდა გამოიჩინოს იმ ქვეყნებთან მიმართებაში, რომლებმაც დიპლომატიური და საკონსულო ურთიერთობების შესახებ ვენის კონვენციის დებულებები დაარღვიეს.
„მიუხედავად ამისა, ბრიუსელი სოლიდარობას უცხადებს ევროკავშირში შემავალ ქვეყანას და ჰოლანდიას იცავს, რომელმაც ღიად დაარღვია ადამიანის უფლებები და ევროპული ღირებულებები, რაც საშიშ ნაბიჯს წარმოადგენს“, - აღნიშნულია განცხადებაში.
პარალელურად, თურქეთის პრეზიდენტმა რეჯეპ თაიპ ერდოღანმა გერმანიის კანცლერს ანგელა მერკელს ბრალი „ტერორისტების მხარდაჭერაში“ დასდო.
აღნიშნულის შესახებ ერდოღანმა “ა ჰაბერ ტივი”-სთვის მიცემულ ინტერვიუში განაცხადა. თურქეთის პრეზიდენტმა გერმანიის კანცლერი ნიდერლანდების მხარდაჭერისთვისაც გააკრიტიკა.