„თეთრი ხმაურის მოძრაობა“ ნარკოტესტირების შემდეგ გარდაცვლილი ლევან აბზიანიძის შესახებ ექსპერტიზის დასკვნას უნდობლობას უცხადებს.
დასკვნის მიხედვით, ლევან აბზიანიძის სიკვდილი გულის უკმარისობამ გამოიწვია, სისხლში აღმოჩენილი შარდმდენი მედიკამენტი „ფუროსემიდე“ კი სიკვდილის გამომწვევ მიზეზად არ არის დასახელებული.
ორგანიზაციაში განმარტავენ, რომ მიუხედავად ექსპერტიზის დასკვნისა, პასუხიმგებლობა მაინც სახელმწიფოს ეკისრება და მკაცრი ნარკოპოლიტიკის შესაცვლელად, „თეთრი ხმაურის მოძრაობა“ აქტიურობას განაგრძობს.
ლევან აბზიანიძე ქუთაისში, 2015 წლის ივნისში, ნარკოტესტირების შემდეგ გარდაიცვალა. ოჯახის განცხადებით, პოლიციელებმა ის ნარკოლოგიურში გადაიყვანეს, სადაც ბიოლოგიური მასალის ჩაბარება მოსთხოვეს. ამისთვის კი შარდმდენი დაალევინეს, რისი უფლებაც არ ჰქონდათ.
ნარკოლოგიურის დატოვების შემდეგ, აბზიანიძე შეუძლოდ გახდა და გარდაიცვალა.