სირიის უსაფრთხოების სამსახურების ორ შენობაზე თვითმკვლელების მიერ განხორციელებული თავდასხმის შედეგად, ჰომსში, 42 ადამიანი გარდაიცვალა, მათ შორის არიან როგორც სამხედროები, ისე სამოქალაქო პირები, ამის შესახებ ინფორმაციას Reuters ავრცელებს.

ადამიანის უფლებათა დაცვის სადამკვირვებლო ორგანიზაციის ინფორმაციით, თავდამსხმელმა ერთ-ერთ შტაბში, სამხედრო უსაფრთხოების ხელმძღვანელი და ოფისის 29 თანამშრომელი დახოცა.

სახელმწიფო უსაფრთხოების სამსახურის მეორე ფილიალს თავს დაესხნენ დილით - 12 ადამიანი ადგილზე გარდაიცვალა.

სირიის ერთ-ერთი სატელევიზიო არხის ინფორმაციით, შეტაკებები ალ-გოუთასა და ალ-მოჰატაში მოხდა, სადაც ძალოვანი უწყებების შტაბები მდებარეობს. სამმა თვითმკვლელმა ასაფეთქებელი მოწყობილობა ორივე ადგილას გაააქტიურა.

როგორც Reuters წერს, ჯერჯერობით, უცნობია, იყვნენ თუ არა თავდამსხმელები ე.წ. ისლამური სახელმწიფოს მებრძოლები ან სხვა რომელიმე ტერორისტული დაჯგუფების წარმომადგენლები.


წყარო: Reuters