გარემოსა და ბუნებრივი რესურსების დაცვის მინისტრის მოადგილე ეკატერინე გრიგალავა სოფლის მეურნეობის სამინისტროში გამართულ სტატისტიკის სტრატეგიული გეგმის (SPAERS) განხილვას დაესწრო.
შეხვედრაზე გაეროს სურსათისა და სოფლის მეურნეობისორგანიზაციის (FAO) ექსპერტებმა დამსწრე საზოგადოებას პროექტის მიმდინარეობა გააცნეს და ახალი ტექნიკური დახმარების პროექტის კონცეფცია წარუდგინეს.
როგორც სოფლის მეურნეობის მინისტრმა ლევან დავითაშვილმა შეხვედრაზე აღნიშნა, სოფლის მეურნეობის სწორი პოლიტიკის წარმოებისთვის დიდი მნიშვნელობა აქვს ზუსტი და მაღალი ხარისხის სტატისტიკის არსებობას. სოფლის მეურნეობის სამინისტრო ინფორმაციის ურთიერთგაცვლის კუთხით აქტიურად ითანამშრომლებს პროექტში ჩართულ ყველა უწყებასთან, რაც სტატისტიკური ინფორმაციის ხარისხს მნიშვნელოვნად გაზრდის. გარემოსა და ბუნებრივი რესურსების დაცვის მინისტრის მოადგილის, ეკატერინე გრიგალავას განცხადებით, გარემოს დაცვის სამინისტროსათვის მინიშნელოვანია სანდო და ობიექტური გარემოსდაცვითი სტატისტიკური მონაცემების და ინფორმაციის არსებობა, რაც ხელს შეუწყობს გარემოსა და ბუნებრივი რესურსების სფეროში ეფექტიანი გადაწყვეტილებების მიღებას. შესაბამისად, მისასალმებელია გაეროს სურსათისა და სოფლის მეურნეობის ორგანიზაციის ახალ ინიციატივა გარემოსდაცვითი და სოფლის მეურნეობის სტატისტიკის გაუმჯობესების მიმართულებით.
ახალი პროექტის მიზანია საქართველოში სტატისტიკური სისტემის განვითარება, საიმედო და ხარისხიანი სტატისტიკური ინფორმაციის წარმოება. პროექტი ხელს შეუწყობს SPAERS-ის ეფექტიან განხორციელებას და პროექტში ჩართული უწყებების შესაძლებლობების გაძლიერებას. პროექტის ფარგლებში მომზადდება სამოქმედო გეგმა, რომელიც ოფიციალური სტატისტიკის წარმოების სრულყოფაზე იქნება ორიენტირებული.