ნაციონალური საკალათბურთო ასოციაციის მიმდინარე რეგულარულ სეზონში მე-16- მატჩი წააგო მოქმედმა ჩემპიონმა „კლივლენდ კავალიერსმა“.

ტაირონ ლიუს გუნდმა დღეს დილით სტუმრად "ოკლაჰომა სითი თანდერთან" დათმო მატჩი, ანგარიშით 109-118. თანაბარი პირველი ტაიმის შემდეგ მასპინძლებმა მეორე ნახევარში განავითარეს საკუთარი უპირატესობა.

რაღა თქმა უნდა, "სითი თანდერს" კვლავ რასელ უესტბრუკი ლიდერობდა, რომელმაც მორიგი სამმაგი დუბლი მიითვალა აქტივში. მისი მაჩვენებელი, 29 ქულა, 12 მოხსნა და 11 შედეგიანი გადაცემა გახლდათ.

კავალერების რიგებში საუკეთესო კაირი ირვინგი იყო 28 ქულით. წაგების მიუხედავად, "კლივლენდი" აღმოსავლეთ კონფერენციის ლიდერად რჩება. "ოკლაჰომა" დასავლეთში, ამ ეტაპზე მეშვიდე პოზიციაზეა.