რუსთავი ორის გენერალური დირექტორი მთავარ პროკურატურას მოუწოდებს, რომ შეწყვიტოს მოსამართლეებზე ზეწოლა და მათი განცხადება გაასაჯაროოს, ამის შესახებ ნიკა გვარამიამ დღეს გამართულ ბრიფინგზე განაცხადა.
მთავარმა პროკურატურამ უზენაესი სასამართლოს მოსამართლეების მიმართვის საფუძველზე, რომელიც მათ საქმიანობაში უხეში ჩარევის შესაძლო ფაქტებს ეხება, გამოძიება დაიწყო. საუბარია მოსამართლე ალავიძესა და ქათამაძეზე, რომლებიც უზენაეს სასამართლოში წარმოებულ „რუსთავი 2“-ის საქმესთან არიან კავშირში.
როგორც ნიკა გვარამიამ ბრიფინგზე განაცხადა, მას შეკითხვა აქვს უზენაესი სასამართლოს თავმჯდომარესთან, რატომ არ გაასაჯაროვა უზენაესი სასამართლოს მოსამართლეების მიერ მათზე განხორციელებულ ზეწოლასთან დაკავშირებული ინფორმაცია პროკურატურაში გადაგზავნამდე. გვარამიას შეფასებით, ნინო გვენეტაძე არის არა მოსამართლეების, არამედ სახელმწიფოს მოკავშირე მოსამართლეების წინააღმდეგ.
„მან პროკურატურაში გადააგზავნა საქმე და მეორე დღიდან დაიწყო მოსამართლეებზე ზეწოლა, რომ ან გაეტანათ განცხადება ან შეეცვლათ განცხადებაში მოყვანილი სუბიექტები და დაესახელებინათ არა ხელსუფლება, არამედ ჩვენი მხარე, ან ის ადამინები, რომლებიც ვითომდა აფილირდებიან ჩვენს მხარესთან, კერძოდ მიხეილ სააკაშვილი და მისი პოლიტიკური თანამოაზრეები.
ეს იმითაც დასტურდება, რომ მას შემდეგ რაც მიზანს ვერ მიაღწიეს, სახელმწიფო უშიშროების სამსახურმა მათი კონტროლირებადი მედიის მეშვეობით, რომელშიც შედის იმედი და ბედუკაძის მედიასაშუალება, დაიწყეს მოსამართლეებზე შავი პიარის აგორება“ - განაცხადა ნიკა გვარამიამ.
რუსთავი ორის გენერალური დირექტორის თქმით, მასთან სეპარატული მოლაპარაკებების წარმოება განწირულია. როგორც გვარამიამ აღნიშნა, ის მოლაპარაკებებს არ მართავს მაშინ, როდესაც არის აბსოლუტურად მართალი და მეორე მხარე ცდილობს მის დაჩაგვრას.
გარდა ამისა, როგორც ნიკა გვარამიამ აღნიშნა, მოსამართლეებთან დაკავშრებით განცხადება აქამდე იმიტომ არ გააკეთა, რომ ელოდებოდა ევროპასთან ვიზალიბერალიზაციის შესახებ კენჭისყრას. მისი თქმით, ევროპარლამენტი ძალიან სენსიტიურია იმ განცხადებების მიმართ, რომლებიც ეხება მედიასა და სასამართლო ხელისუფლების დამოუკიდებლობას.
„ვიცით, რომ რუსთვი ორის საქმე გახდა ბევრჯერ გადამწყვეტი, მათ შორის ამ მიზეზითაც არაერთხელ გადაიდო კენჭისყრა ევროპარლამენტში“ - განაცხადა გვარამიამ.