ჯანდაცვის მინისტრმა დავით სერგეენკომ ზუგდიდში მშენებარე ​სკრინინგისა და C ჰეპატიტის მართვის ცენტრში ხარვეზები აღმოაჩინა.

მინისტრმა ობიექტი გახსნამდე დაათვალიერა. მასთან ერთად, ობიექტზე იმყოფებოდნენ სამეგრელო-ზემო სვანეთის გუბერნატორი ლევან შონია და სამშენებლო კომპანიის წარმომადგენლები.

როგორც სერგეენკომ განაცხადა, გეგმის თანახმად, შენობა შარშან, ნოემბერში უნდა გახსნილიყო, თუმცა დღემდე არის ხარვეზები, რომლებიც გამოსასწორებელია. მინისტრმა სამშენებლო კომპანიას მათ აღმოსაფხვრელად 10 დღიანი ვადა მისცა. წინააღმდეგ შემთხვევაში, სერგეენკოს განცხადებით, სამინისტრო კომპანიასთან ურთიერთობას შეწყვეტს.

სამშენებლო კომპანიის ხელმძღვანელის რევაზ ნაჭყებიას განცხადებით, ხარვეზები უმნიშვნელოა და 10 დღის ვადაში მათი მოგვარება პრობლემა არ იქნება.

სკრინინგისა და C ჰეპატიტის მართვის ცენტრის მშენებლობა 1.2 მლნ ლარი ჯდება.