ხვალ გახდება ცნობილი, დაიწყებს თუ არა სახელმწიფო საკონსტიტუციო კომისია მოქმედი საარჩევნო სისტემის შეცვლაზე მუშაობას. კენჭისყრის ჩატარებამდე ჯგუფში აზრთა სხვადასხვაობაა.
მთელი ოპოზიციური სპექტრი, მესამე სექტორთან ერთად, მაჟორიტარული არჩევნების გაუქმებას და სამხარეო-პროპორციულ სისტემაზე გადასვლას ითხოვს. წინადადებას ეწინააღმდეგებიან მოქმედი მაჟორიტარები.
შეთავაზებული ცვლილებების გარშემო საბოლოო პოზიცია ჯერ ისევ არ აქვს ჩამოყალიბებული მმართველ გუნდს.
კიდევ ერთი საკითხი, რომელსაც კომისიამ ხვალ უნდა უყაროს კენჭი, პარლამენტის თბილისში გადმოტანას ეხება. თუ წინადადება საკმარის ხმებს მოაგროვებს, მაშინ საკონსტიტუციო კომისია კანონპროექტს ამ მიმართულებითაც მოამზადებს.
დღესვე ცნობილი ხდება, რომ კომისიის მიერ შემუშავებულ ყველა ცვლილებას საპარლამენტო განხილვების დაწყებამდე ვენეციის კომისია შეაფასებს.