ე.წ. ფარული ჩანაწერების საქმის ერთ-ერთ ეპიზოდზე პროკურატურამ მოწმეების დაკითხვა დაასრულა. საუბარია კუდ-ისა და ძველი თბილისის პოლიციის ყოფილი მაღალჩინოსნების ეპიზოდზე.
სასამართლო პროცესზე, დღეს, ჩვენება მისცა ერთ-ერთი კავშირგაბმულობის კომპანიის წარმომადგენელმა, რომელმაც პროკურორის განმარტებით, ბრალდებულების სატელეფონო ამონაწერებზე ისაუბრა.
დღესვე, ბრალდების მხარემ წერილობითი მტკიცებულებების გამოკვლევა დაიწყო, მომდევნო ეტაპზე კი მოწმეების დაკითხვას დაცვის მხარე შეუდგება. დაცვის მხარე გამამართლებელ განაჩენში დარწმუნებულია, საპირისპიროს ამტკიცებს პროკურორი.
დაკავებულებს პირადი ცხოვრების ამსახველი კადრების უკანონოდ მოპოვება-შეძენას და სამსახურეობრივი უფლებამოსილების გადამეტებას ედავებიან. საქმის ფიგურანტები წინასწარი პატიმრობის ვადის გასვლის გამო გათავისუფლებულები არიან.