შეერთებული შტატების მოქმედმა პრეზიდენტმა ბარაკ ობამამ გააუქმა რეგულაცია, რომლის თანახმად, აშშ-ში ჩასულ კუბის მოქალაქეებს ვიზის გარეშე ლეგალურად ცხოვრების უფლება ეძლეოდათ.

არსებული ინფორმაციით, ამერიკის საიმიგრაციო პოლიტიკაში შეტანილი ცვლილება ძალაში უკვე შევიდა. რეგულაცია, რომელიც აშშ-ში ჩასულ კუბელებს ქვეყანაში ლეგალურად დარჩენის უფლებას აძლევდა, 20 წლის განმავლობაში მოქმედებდა.

საპასუხოდ, ოფიციალურმა ჰავანამ თანხმობა გამოთქვა, უკან მიიღოს კუბელები, რომლებსაც აშშ-იდან გამოასახლებენ.

საპრეზიდენტო ვადის ბოლო დღეებში გადადგმული ეს ნაბიჯი ობამას პოლიტიკის ნაწილია, რომელიც კუბასთან ურთიერთობების გადახედვას ითვალისწინებს.

წყარო: AP, BBC

ფოტო: EUROPEAN PHOTOPRESS AGENCY