საზოგადოებრივი მაუწყებლის გენერალური დირექტორის ვინაობა პირველ ტურში ვერ გამოვლინდა და კანონის თანახმად, განმეორებითი კენჭისყრა ორ კანდიდატს - ვასილ მაღლაფერიძესა და თინათინ ბერძენიშვილს შორის გაიმართება.

ახალი გენერალური დირექტორის გამოსავლენად, სამეურვეო საბჭოს სხდომა გაიმართა, რომელზეც 5 კანდიდატიდან ერთი კანდიდატი უნდა აერჩიათ.

მეურვეთა ხმები ასე გადანაწილდა:

ვასილ მაღლაფერიძე - 4

თინათინ ბერძენიშვილი - 2

ნინო ზაუტაშვილი -1

ნათია კუპრაშვილი - 1

ზაალ ანჯაფარიძე - 0

მაუწყებლის ბორდი ამჟამად 8 მეურვისგან შედგება. გენერალური დირექტორის შესარჩევად, საჭირო იყო მინიმუმ 5 მეურვის ხმა.

საზოგადოებრივი მაუწყებლის გენერალური დირექტორის თანამდებობის დასაკავებლად კონკურსში მონაწილეობის სურვილი, თავდაპირველად, 15-მა კანდიდატმა გამოთქვა, თუმცა სამეურვეო საბჭოს მიერ მათი დოკუმენტაციის გაცნობის შემდეგ, ერთი - ბაჩუკი ბახტაძე მომდევნო ეტაპზე ვერ გადავიდა, 14 კანდიდატიდან კი მეურვეებმა მეორე ტურისთვის 5 შეარჩიეს.

სსიპ „საზოგადოებრივი მაუწყებლის“ სამეურვეო საბჭომ გენერალური დირექტორის ვაკანტურ თანამდებობაზე ღია კონკურსი 2016 წლის 28 ნოემბერს გამოაცხადა. მსურველთა განცხადებების მიღება 28 დეკემბერს დასრულდა, ხოლო კანონით დადგენილი სამი დღის გასვლის შემდეგ, სამეურვეო საბჭომ კანდიდატთა სია გაასაჯაროა.