25 დეკემბერი პატრიარქის აღსაყდრების დღეა. უკვე 39 წელია ილია მეორე საქართველოს მართლმადიდებელ ეკლესიას უძღვება.

იუბილესთან დაკავშირებით, სამების საკათედრო ტაძარში საზეიმო წირვა მეუფე დანიელმა აღავლინა. უწმინდესის აღსაყდრების დღესთან დაკავშირებით, უკრაინისა და კიევის მართლმადიდებელი ეკლესიის მეთაური მიტროპოლიტი ონოფრე, დელეგაციის წევრებთან ერთად საქართველოს ეწვია.

საზეიმო წირვას მინისტრთა კაბინეტის წევრები და საკრებულოს თავმჯდომარე დაესწრნენ. სრულიად საქართველოს კათოლიკოს პატრიარქს იუბილე პრეზიდენტმა და პრემიერმინისტრმა მოულოცეს.

გიორგი მარგველაშვილისა და გიორგი კვირიკაშვილის განცხადება, მათი „ფეისბუქის" ოფიციალურ გვერდზე გამოქვეყნდა.

პატრიარქის ინტრონიზაცია 1977 წლის 25 დეკემბერს სვეტიცხოვლის საკათედრო ტაძარში მოხდა. მას სახელად ილია მეორე ეწოდა.

უწმინდესის აღსაყდრების დროს საქართველოში 15 ეპარქია და დაახლოებით 30-ზე მეტი მოქმედი ტაძარი იყო.

დღეისთვის სულ 47 ეპარქიაა, პატრიარქის ჩათვლით კი 48 მღვდელმთავარია, მათგან სამი ტიტულარულია.

გაიზარდა ტაძრების, მონასტრების, ბერ-მონაზვნებისა და სასულიერო პირების რაოდენობა.

დღეისთვის საქართველოში დაახლოებით 2 000-მდე მოქმედი ეკლესია-მონასტერია და 3 000-მდე სასულიერო პირი და ბერ-მონაზონი.