გერმანიის ბუნდესლიგაში პირველი წრე დასრულდა.

ზამთრის ჩემპიონი მიუნხენის „ბაიერნია". რეკორდმაისტერმა, გუშინ, საკუთარ ალიანს არენაზე, სეზონის აღმოჩენა და ერთ-ერთი ლიდერი, „ლაიპციგი" დიდი ანგარიშით დაამარცხა.

კარლო ანჩელოტის გუნდმა საქმე პირველივე ტაიმში დაამთავრა, რომელშიც მეტოქის კარი, სამჯერ აიღო. გოლები ტიაგო ალკანტარამ, ჩაბი ალონსომ და რობერტ ლევანდოვსკიმ გაიტანეს. აღსანიშნავია, რომ სტუმრები 30-ე წუთზე ათი კაცით დარჩნენ მოედანზე.

თამაშის მეორე ნახევარში აღარაფერი შეცვლილა და ბავარიელებმა 3-0 გაიმარჯვეს.

მიუნხენელებმა პირველი წრე, ლიდერის რანგში 39 ქულით დაასრულეს. „ლაიპციგს" აქტივში 36 ქულა აქვს და მეორე ადგილზეა, მესამეზე კი ჯერჯერობით ბერლინის „ჰერტაა".

ბუნდესლიგის გათამაშება მომავალი წლის 20 იანვარს განახლდება.