ერთ კვირაში გახდება ცნობილი, დადგება თუ არა ქობულეთის მუსლიმთა პანსიონის საქმეზე შინაგან საქმეთა სამინისტროს პასუხისმგებლობაც.
საქმის განხილვა 29 დეკემბერს განახლდება. სასამართლოში სასწავლებლის ინტერესებს „ადამიანის უფლებების სწავლებისა და მონიტორინგის ცენტრი“ იცავს.
არასამთავრობო ორგანიზაცია 19 სექტემბერს ბათუმის საქალაქო სასამართლოს მიერ, ამავე საქმეზე მიღებული გადაწყვეტილების იმ ნაწილს ასაჩივრებს, რომლის მიხედვით, შინაგან საქმეთა სამინისტრო გამართლდა. თუმცა მოსამართლემ დისკრიმინაციის ფაქტი დაადგინა და კერძო პირებს ზიანის სიმბოლური ანაზღაურების ვალდებულება დააკისრა.
„ი-ემ-სი" კი მიიჩნევს, რომ მუსლიმი თემის უფლებების ხელშეშლა პოლიციის უმოქმედობამ გამოიწვია.
შეგახსენებთ, რომ ქობულეთში მდებარე მუსლიმთა პანსიონის შესასვლელზე 2014 წლის 10 სექტემბერს ღორის თავი ააკრეს.