ორი ტერაქტი ერთ დღეში ორსაათიანი ინტერვალით - ანკარასა და ბერლინში მომხდარმა თავდასხმებმა მსოფლიოს პოლიტიკური დღის წესრიგი შეცვალა. #ტერაქტი
თურქეთის დედაქალაქში გვიან ღამით რუსეთის ელჩი მოკლეს. ანკარაში უკვე ჩავიდნენ გამომძიებლები მოსკოვიდან. ერთობლივი საგამოძიებო ჯგუფი ახლა არკვევს, ჰყავდა თუ არა 22 წლის თავდამსხმელს თანამზრახველები და როგორ შეაღწია მკვლელმა თანამედროვე ხელოვნების გალერეაში, სადაც შემზარავი ფაქტი მოხდა.
მონაცემები თავდამსხმელის შესახებ: მევლუტ ალტინტაში პოლიციის ყოფილი თანამშრომელია. ის უწყებიდან ივლისში სამხედრო გადატრიალების მცდელობის შემდეგ დაწყებული მასობრივი საკადრო წმენდის დროს დაითხოვეს.
გამოძიების დასრულებამდე ადგილობრივი მედია ტერორისტის და ამერიკაში მცხოვრები თურქი მქადაგებლის, ფეთჰულა გიულენის კავშირებზე წერს.
ელჩის მკვლელობა კამერამაც დააფიქსირა. კადრებში ჩანს, როგორ გადაადგილდება პოლიციის ფორმაში ჩაცმული თავდამსხმელი ანდრეი კარლოვის ზურგსუკან.