შეიარაღებული თავდასხმის შედეგად, თურქეთში რუსეთის ელჩი ცეცხლსასროლი იარაღით მძიმედაა დაჭრილი და საავადმყოფოშია გადაყვანილი. ამის შესახებ ადგილობრივი მედია იუწყება.

გავრცელებული ინფორმაციით, თავდასხმა ანკარაში, ფოტოგამოფენის გახსნაზე მოხდა, სადაც ანდრეი კარლოვი სიტყვით გამოდიოდა. თურქული მედია წერს, რომ ელჩს ზურგიდან ესროლეს.

ვრცელდება ინფორმაცია, რომ ელჩის გარდა, დაჭრილია კიდევ რამდენიმე პირი.

ერთ-ერთი თურქული სააგენტოს ცნობით, თავდასხმა ბრალდებულმა შეძახილის - „ალეპო“ ფონზე განახორციელა.

ამ წუთებში შემთხვევის ადგილზე სპეცრაზმია მობილიზებული.

მომხდარის შესახებ სპეციალურ ეთერს ახორციელებს CNN Turk-ი.