15 დეკემბერი, 2016
• გადაცემა ინტერVIEW-ს მორიგი გამოშვებაში სალომე ასათიანის სტუმარია გერჰარდ შიკი, გერმანელი ეკონომისტი და პოლიტიკოსი. 2005 წლიდან ის გერმანიის პარლამენტის წევრია, ამჟამად უკავია ბუნდესტაგის საფინანსო კომიტეტის თავმჯდომარის მოადგილის პოსტი, წარმოადგენს ფრაქციას “90/მწვანეები”.
• დასავლეთში − და მთელ მსოფლიოშიც − მწვანეთა მოძრაობები ხშირად ერთმანეთისგან განსხვავებულია, მრავალფეროვანია “მწვანეთა” იდეოლოგიური პლატფორმები თუ მსოფლმხედველობა. მათი მოძრაობა მოიცავს გარემოს დამცველებს, ატომური ენერგიის მოწინააღმდეგეებს, ბუნების კონსერვაციის მომხრეებს, ცხოველთა დამცველებს, მოაზროვნეებს, საკუთრივ მწვანეთა პარტიებს, ეკოფემინისტებსა და ასე შემდეგ.
• მაინც, რა იდეა, რა პრინციპი აერთიანებს ყველა ამ ჯგუფს? როგორია მწვანეთა პარტიის გავლენა გერმანიაში, სადაც ეს პარტია უკვე დაახლოებით სამი ათწლეულია, საპარლამენტო ცხოვრების განუყოფელი ნაწილია?
• რა პასუხი აქვთ “მწვანეებს” ხშირ ბრალდებაზე, რომ ისინი აზვიადებენ გარემოს დაცვის კუთხით არსებულ მდგომარეობას და ამით ხელს უშლიან ეკონომიკის განვითარებას?
• რა შეიძლება ითქვას ცნობებზე, რომ ფიქლის გაზის მოწინააღმდეგე გარემოს დამცველ ჯგუფებს აფინანსებს რუსეთი, რომელსაც ბუნებრივ აირზე მაღალი ფასის შენარჩუნება სურს?
• რას გულისხმობს გერჰარდ შიკი, როცა წერს, რომ დასავლეთი უნდა დაუბრუნდეს საბაზრო ეკონომიკას, რომელიც დღეს “კორპორაციულმა ეკონომიკამ” შეცვალა?
• და რის სწავლა შეუძლია ევროპელი მწვანეებისგან საქართველოს, რომლის ეკონომიკური, სოციალური მდგომარეობა, კულტურული კონტექსტი მნიშვნელოვნად განსხვავდება დასავლეთის სივრცისგან?
ამ და სხვა საკითხებს ეხება სალომე ასათიანის საუბარი გერჰარდ შიკთან.