აქციის ორი მონაწილე გუშინ ნარკოპოლიტიკის დეკრიმინალიზაციის მოთხოვნით გამართულ შეკრებაზე, პოლიციისთვის დაუმორჩილებლობის გამო დააკავეს.
სამართალდამცველებთან დაპირისპირება კი მას შემდეგ დაიწყო, რაც საპროტესტო აქციის მონაწილეებმა რუსთაველი გადაკეტეს და გამზირი „თეთრი ხმაურის" ბანერით დაფარეს.
პოლიციამ კი გზის გათავისუფლება, როგორც შეკრებილები ამბობენ, ძალის გამოყენებით სცადა.
„თეთრი ხმაურის” მოძრაობის წევრების დროულად გათავისუფლების მოთხოვნით პოლიციის მთავარ სამმართველოსთან აქცია ღამითვე გაიმართა. ადგილზე არასამთავრებო ორგანიზაციებიც იმყოფებოდნენ, დემონსტრანტებს ადვოკატირებას „ი-ემ-სი” უწევს.
მესამე სექტორის წარმომადგენლები აცხადებენ, რომ სამართალდამცველებს აქციის მონაწილეთა დაკავების საფუძველი არ ჰქონდა.