თბილისის სამშობიარო კლინიკებს დონეები განესაზღვრა. პერინატალური რეგიონალიზაციის საკოორდინაციო საბჭოს მიერ დონე განესაზღვრა 16 სამშობიარო კლინიკას. დაწესებულებების ხელმძღვანელებს კი ამის დამადასტურებელი სერტიფიკატები გადაეცათ.
აღნიშნული პროცესი სამედიცინო მომსახურების ხარისხის გაუმჯობესების ინსტრუმენტია და სამშობიარო კლინიკების შეფასებას გულისხმობს.
დონის განსაზღვრის შემდეგ სამედიცინო დაწესებულება პაციენტს კომპეტენციის შესაბამის სერვისს მიაწვდის.
სამშობიარო კლინიკების დონეების განსაზღვრის მიზნით, სამინისტრომ მონიტორინგის მექანიზმი შეიმუშავა. თითოეული შემთხვევა პაციენტის ექიმთან კონტაქტის წუთიდან შეისწავლება.
რეგიონალიზაციის პროცესი წელიწადზე მეტია დაიწყო. დონეების განსაზღვრა მთელი ქვეყნის მასშტაბით მიმდინარეობს და პროცესი 2017 წლის ბოლომდე დასრულდება.