გერმანიაში ჩასული რუსეთის პირველი დიპლომატი მწვავე კრიტიკის ადრესატი გახდა. სერგეი ლავროვს საერთაშორისო ვალდებულებები და ეუთოს პრინციპები ამჯერად ჰამბურგში შეახსენეს, სადაც დღეს ეუთოს საგარეო საქმეთა მინისტერიალი გაიხსნა.

გამოსვლის დროს უკრაინასთან ერთად საქართველოც ახსენა ამერიკის შეერთებული შტატების სახელმწიფო მდივანმა, რომლის თქმით, გაჭიანურებული კონფლიქტები ევროპის უსაფრთხოებას საფრთხეს უქმნის.

ლავროვმა მოუსმინა ქართველ კოლეგასაც, რომელმაც მოსკოვი ოკუპაციის გაგრძელებასა და ანექსიისკენ მიმართული ნაბიჯების გადადგმაში დაადანაშაულა. ერთ-ერთ მაგალითად გაერთინებულ სამხედრო დაჯგუფებაზე სოხუმთან ხელმოწერილი ე.წ. შეთანხმება დასახელდა.