კაჭრეთში, სასტუმრო „ამბასადორში“ მიმდინარე ეროვნული თავდაცვის უმაღლესი კურსის მეორე დღე საქართველოს საგარეო და თავდაცვის პოლიტიკის პრიორიტეტებზე მსჯელობას დაეთმო.
საქართველოს თავდაცვის მინისტრის პირველმა მოადგილემ მოხსენება თავდაცვის პოლიტიკის პრიორიტეტებზე საუბრით დაიწყო. ლელა ჩიქოვანმა აღნიშნა, რომ საქართველო უნდა გაძლიერდეს იმიტომ, რომ პარტნიორებს რეგიონში ძლიერი ქვეყანა სჭირდებათ. ამ მხრივ, მან ნატოს სტანდარტებთან თავსებადობის მიღწევაზე გაამახვილა ყურადღება. მისი თქმით, მეტი ნატო საქართველოში აღიქმება როგორც შეიარაღებული ძალების თავსებადობა ალიანსთან, რაც ნიშნავს მეტ გამოცდილებასა და იმ ნაკლოვანებების აღმოფხვრას, რაც დღეს თავდაცვის უწყებაში არსებობს. მან გაძლიერებული შესაძლებლობების ინიციატივის პარტნიორობის ფორმატის ქვეყნებთან, განსაკუთრებით ფინეთთან და შვედეთთან ორმხრივი თანამშრომლობის გაძლიერების აუცილებლობაზე და სკანდინავია-ბალტიისპირეთის თანამშრომლობის ფორმატში ჩართულობაზეც ისაუბრა.