დღეს, ვაზიანის მეოთხე მექანიზირებულ ბრიგადას ჟურნალ OK-ის რედაქტორი ოლგა ბაბლუანი და სარედაქციო ჯგუფი ეწვია. მათი ინიციატივით სამხედრო მოსამსახურეებისთვის ზაზა ურუშაძის ფილმის „მანდარინების“ ჩვენება მოეწყო.
ღონისძიებაზე მოწვეულები იყვენენ ფილმის რეჟისორი და მსახიობები. ღონისძიებას დაესწრო თავდაცვის მინისტრი ლევან იზორია. მან სიტყვით მიმართა მოწვეულ სტუმრებს და ჟურნალ OK-ის წარმომადგენლებს მადლობა გადაუხადა ღონისძიების ჩატარებისთვის და გამოჩენილი ყურადღებისთვის.
„შემოქმედი ადამიანისთვის, ეს მართლაც საპასუხისმგებლო თემაა, როდესაც საკუთარ შემოქმედებაში ცდილობ ასეთი ჯარისკაცის, თავისი ქვეყნის მიმართ ასეთი ერთგული ადამიანის ღვაწლი ღირსეულად წარმოაჩინო, წარმოაჩინო მისი ადამიანური გრძნობები, მისი გმირობა, მისი უნარი, სიყვარული ქვეყნის მიმართ, მეგობრის მიმართ, მტრისადმი დამოკიდებულება. სწორედ, შემოქმედის მისიაა, რომ ეს გამოხატოს და უკვდავყოს.“ - განაცხადა ლევან იზორიამ.
„ჟურნალი OK ყოველი ახალი ნომრის გამოსვლისას სოციალურ ღონისძიებას აკეთებს. გვინდა, რომ ჟურნალს ჰქონდეს სოციალური აქტიურობა. ამ ნომრისთვის გადავწყვიტეთ, რომ ჯართან გვქონოდა შეხვედრა. ჩემთვის, ყოველთვის ახლოს იყო ჯარი და გვინდოდა, რომ ჩვენი პატივისცემა გამოგვეხატა ქართული ჯარისთვის. არ არსებობს სახელმწიფო, რომელსაც არ გააჩნია ჯარი. ჩვენს სახელმწიფოს აქვს ძალიან მოკლევადიანი დამოუკიდებლობის ისტორია, ისევე როგორც ჩვენს ჯარს“. - განაცხადა ოლგა ბაბლუანმა.
ჟურნალ OK-ის წარმომადგენლებმა სამხედროებისთვის სხვადასხვა ტიპის საჩუქრები გაათამაშეს და საზეიმოდ გადასცეს.