შეხვედრა პოლონეთის გენერალური შტაბის უფროსთან
საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ და გენერალური შტაბის წარმომადგენლებმა, ოთხვარსკვლავიანი გენერლის მიჩესლავ გოცულის ხელმძღვანელობით პოლონურ დელეგაციას უმასპინძლეს. მხარეებმა განიხილეს ურთიერთთანამშრომლობის მიმდინარე პროცესები და სამომავლო მიმართულებები.
პოლონელმა გენერალმა მადლობა გადაუხადა ვახტანგ კაპანაძეს თბილისში მოწვევისთვის. მან ხაზი გაუსვა, რომ საქართველოს შეიარაღებულ ძალებს სანდო პარტნიორად მიიჩნევს და სათანადოდ აფასებს იმ როლს, რასაც ქართული არმია წლების განმავლობაში თამაშობს საერთაშორისო უსაფრთხოების უზრუნველსაყოფად. მან აღნიშნა ასევე სახელმწიფოს განსაკუთრებული ძალისხმევაც ამ მიმართულებით.
ვახტანგ კაპანაძე: „ზოგადად პოლონეთის შეიარაღებული ძალები საქართველოს სტრატეგიული პარტნიორები არიან. ისინი გვეხმარებიან ჩვენ ჩვენი შეიარაღებული ძალების განვითარებაში, მათ აღებული აქვთ მიმართულება სპეციალური ძალებისა და სამხედრო პოლიციის განვითარების.
შესაბამისად, გენერალური შტაბის და შტაბის დელეგაციის ვიზიტი ძალიან მნიშვნელოვანია ჩვენთვის. მათ გავაცანით მიმდინარე პროცესები, მიმდინარე რეფორმები შეიარაღებულ ძალებში და ასევე დავსახეთ მომავალი თანამშრომლობის გეგმები“.
მიჩესლავ გოცული: „შეხვედრაზე განვიხილეთ სამომავლო თანამშრომლობის პერსპექივები და ნატო-საქართველოს არსებითი პაკეტის შესახებ არსებული საკითხები. ჩვენ გავაგრძელებთ სამხედრო სფეროში თანამშრომლობას, რადგან ჩვენ ვხედავთ საქართველოს, როგორც სტაბილურობის და უსაფრთხოების საყრდენს, ასევე, იმას, თუ რამდენად მნიშვნელოვანი წვლილი შეუძლია შეიტანოს ევროპის უსაფრთოებაში საქართველოს შეიარაღებულმა ძალებმა“.