საქართველოს შეიარაღებული ძალების სამხედრო საინჟინრო ბრიგადის სამწყობრო მოედანზე EUCOM-ის სწავლების გახსნის საზეიმო ცერემონიალი გაიმართა. აშშ-ის ევროპული სარდლობის (EUCOM) სწავლება მიზნად ისახავს სამხედრო მოსამსახურეებისათვის აუფეთქებელი საბრძოლო მასალების აღმოჩენის, უსაფრთხო ადგილას გადატანისა და ადგილზე განადგურების ხერხების გაცნობას, ასევე განაღმვით ოპერაციებში სამხედრო ინჟინრებით დაკომპლექტებული ასეულის შესაძლებლობების გაზრდას.

ნატოს „პარტნიორობა მშვიდობისათვის“ ნდობის ფონდის პროექტ „საქართველო IV“-ის ფარგლებში, EUCOM-ის მიერ EOD-ის პირველი დონის ინსტრუქტორთა მომზადების მესამე, დასკვნითი ფაზის სწავლება დღეს დაიწყო. სწავლების მონაწილეებს სიტყვით შეიარღებული ძალებისა და აშშ-ის ევროპული სარდლობის წარმომადგენლებმა მიმართეს და წარმატება უსურვეს. ღონისძიებაზე შესრულდა აშშ-სა და საქართველოს ჰიმნები. სამხედრო მოსამსახურეებმა წუთიერი დუმილით პატივი მიაგეს საქართველოს ერთიანობისთვის ბრძოლაში დაღუპულ გმირებს.

EUCOM-ის ორკვირიან კურსში საინჟინრო ბრიგადის EOD ასეულის 30 სამხედრო მოსამსახურე მონაწილეობს. მათგან 10 სამხედროს უკვე გავლილი აქვს სწავლების პირველი და მეორე ფაზა, რომლის დროსაც ამერიკელი და ქართველი სამხედრო მოსამსახურეები, აუფეთქებელი საბრძოლო მასალების ამოცნობისა და განადგურების მიზნით, თეორიულ და პრაქტიკულ სწავლებას ერთობლივად გეგმავდნენ. სწავლების მესამე ფაზა კი, მომზადებული ქართველი ინსტრუქტორების მიერ დაგეგმილი სამუშაოების ამერიკული მხრიდან მონიტორინგს გულისხმობს.

სწავლების თეორიული ნაწილის პარალელურად, პრაქტიკული მეცადინეობები ვაზიანის სამხედრო პოლიგონზეც გაიმართება.