კახა კალაძემ ენერგეტიკის მინისტრის პოსტი დატოვა. შესაბამისი განცხადება მან უწყებაში გამართულ ბრიფინგზე გააკეთა და თანამშრომლებს დაემშვიდობა. გადადგომის მიზეზი საკანონმდებლო შეზღუდვებია, რომლის მიხედვით პარლამენტის წევრობის კანდიდატად რეგისტრაციის შესახებ განცხადების წარდგენიდან არა უგვიანეს მე-2 დღისა, დაკავებული თანამდებობიდან უნდა გადადგნენ და გათავისუფლდნენ პირები, რომელთა თანამდებობებიც დეპუტატობის კანდიდატობასთან შეუთავსებელია.
ამავე მიზეზით, თანამდებობა დატოვა სოფლის მეურნეობის მინისტრმა ოთარ დანელიამ.
დღესვე, პრემიერმინისტრმა ენერგეტიკისა და სოფლის მეურნეობის ახალი მინისტრები წარადგინა. ენერგეტიკის მინისტრის პოსტს კახა კალაძის მოადგილე ილია ელოშვილი დაიკავებს, სოფლის მეურნეობის სამინისტროს კი ღვინის ეროვნული სააგენტოს ყოფილი უფროსი და ოთარ დანელიას მოადგილე ლევან დავითაშვილი უხელმძღვანელებს.
კახა კალაძე ქართული ოცნების პარტიული სიაში მე-2 ნომერია, ოთარ დანელია კი 115-ე და მარტვილისა და აბაშის მაჟორიტარობის კანდიდატი.