სასკოლო სახელმძღვანელოებთან დაკავშირებით ცნობილი ხდება, რომ სამინისტრომ კვლავ ერთპირთან მოლაპარაკებით, გამარტივებული შესყიდვის საშუალებით 2 ,5 მლნ ლარიანი ხელშეკრულება გააფორმა შპს ,,ფორმასთან“ 2016-17 სასწავლო წლის სასკოლო წიგნების ბეჭვდასთან დაკავშირებით. აღნიშნული გადაწყვეტილება - განხორციელდეს სახელმძღვანელოების სტამბური ბეჭვდა, იმ ფონზე, როცა გამომცემლობებში არსებობს საჭირო რაოდენობის ნაშთი და, თავის მხრივ, გამომცემლობები მზად არიან მეოთხედ ფასად გადასცენ სამინისტროს საჭირო რაოდენობის სახელმძღვანელო, სამინისტროს მხრიდან გახლავთ უპასუხისმგებლო გადაწყვეტილება და, ამავდროულად, ბიუჯეტის თანხების გაფლანგვა კონკრეტული პირების სასარგებლოდ.
ხელშეკრულებიდან გამომდინარე, წიგნების საცალო ღირებულება ზოგ შემთხვევაში შეადგენს 20 ლარს, მაშინ როცა გამომცემლები აცხადებდნენ, რომ მზად იყვნენ ორ ლარ-ნახევრად მიეყიდათ სახელმწიფოსთვის გამომცემლობებში ნაშთის სახით არსებული მარაგი.
გამარტივებული შესყიდვის აუცილებლობის სამოტივაციო ნაწილში აღნიშნულია, რომ დროის სიმცირის გამო ვერ მოხერხდა საჭირო მონაცემების შეგროვება, თუმცა უნდა აღინიშნოს რომ ხელშეკრულების დიდი ნაწილი განკუთვნილია სასკოლო რვეულების ბეჭვდისთვის, რაც ერთჯერადი გამოყენებისაა, შესაბამისად, ყოველგვარი კვლევის გარეშე შესაძლებელი იყო ეს სეგმენტი ,,სახელმწიფო შესყიდვების შესახებ“ საქართველოს კანონისა და მის საფუძველზე გამოცემული კანონმდებარე ნორმატიული აქტების შესაბამისად განხორციელებულიყო.
გარდა ამისა, ხელშეკრულებით გათვალისწინებული დროის მონაკვეთი ბეჭვდისა და დისტრიბუციის ჩათვლით, ხელშეკრულების დაგვიანებით გაფორმების გამო, ცილდება სასწავლო წლის დაწყების თარიღს, რაც ერთმნიშვნელოვნად მიანიშნებს იმაზე, რომ სასკოლო სახელმძღვანელოებისა და რვეულების მიწოდება ვერ განხორციელდება საჭირო ვადებში, რაც დიდი ალბათობით, სასწავლო პროცესის ჩაშლას გამოიწვევს.
ოფიციალური მონაცემების მიხედვით უფასო სახელმძღვანელოების პროექტისათვის 36 მილიონი ლარი იქნა გამოყოფილი 2013-1016 წლებში, აქედან, გამარტივებული შესყიდვით, ერთპირთან მოლაპარაკების საფუძველზე, 29 მილიონი გაიცა კონკრეტულ პირებზე, ელექტრონული ტენდერის გარეშე, ამ ფაქტით პირდაპირ დასტურდება, რომ არსებული ინიციატივით განათლების სისტემაში დასაქმებული მაღალჩინოსნების პირადი ინტერესების გამო დაზარალდა სახელმწიფო ბიუჯეტი. 2013 წლიდან დღემდე უფასო სახელმძღვანელოების პროგრამა მუდმივად ტოვებს კითხვის ნიშნებს, რაზეც ჩვენს გამოსვლებში არაერთხელ გავამახვილეთ ყურადღება, ასევე, ამ საკითხს საკმაოდ ვრცელი ადგილი ჰქონდა დათმობილი სახელმწიფო აუდიტის დასკვნაშიც. გვაქვს გონივრული ეჭვი, რომ სახეზეა კორუფციისა და პროტექციონიზმის ნიშნები, რაც დიდი წარმატებით გაგრძელდა ახალი მინისტრის მოღვაწეობის პერიოდშიც.
ამ ფაქტს ადასტურებს ისიც, რომ ჩვენთვის ცნობილი გახდა, შპს ,,ფორმას“ მიერ სუბქოტრაქტორებთან გაფორმებული ხელშეკრულების შესახებ, რაც ხაზს უსვამს იმას, რომ შერჩეული სტამბა საკუთარი ტექნიკური შესაძლებლობითა და ვადების გათვალისწინებით, ვერ უზრუნველყოფს შეკვეთის შესრულებას, მაშასადამე, სამინისტროს მიერ გაკეთებული არჩევანი, სახელმწიფო ბიუჯეტის ხარჯზე, გარკვეული წრეების პირად ინტერესებს ემსახურება.
აქვე, კიდევ ერთხელ, ჩვენი მხრივ, ვპირდებით გამომცემლობებსა და სახელმძღვანელოების ავტორებს, რომ - ჩვენ 2017 წელსვე მოვახდენთ სასკოლო სახელმძღვანელოების ბაზრის დერეგულაციას. შედეგად, გაუმჯობესდება სახელმძღვანელოების ხარისხი და ხელმისაწვდომობა, დაცული იქნება სახელმძღვანელოს ავტორთა საავტორო უფლებები;