დღეს ჩინეთის სახალხო რესპუბლიკას საელჩოს საქართველოში და მედია-ჯგუფ „სტარვიზიას“ შორის თანამშრომლობის ხელშეკრულებაზე ხელმოწერის ცერემონია გაიმართა. ცერემონიას ჩინეთის სახალხო რესპუბლიკის ელჩი საქართველოში ბატონი ძი იანჩი, „სტარვიზიის“ ხელმძღვანელობა და მისი დამფუძნებელი გია ალიხანაშვილი დაესწრნენ. ღონისძიება შეეხო ერთობლივი პროექტის “გზა ჩინეთისკენ“ განხორციელების ფარგლებში თანამშრომლობის დაწყებას. პროექტი ხორციელდება საქართველოში ჩინეთის საელჩოს მხარდაჭერით.

„გზა ჩინეთისკენ“ - ეს არის პირველი მულტიმედია პროექტი საქართველოში, რომელიც ჩინეთის შესახებ მინის-ერიალის გადაღებას გულისხმობს. პროექტი მიზნად ისახავს საქართველო-ჩინეთის ურთიერთობების პოპულარიზაციასა და გაღრმავებას. როგორც ჩინეთის სახალხო რესპუბლიკის ელჩმა საქართველოში, ძი იანჩიმ შეხვედრაზე აღნიშნა, „ორმხრივი ურთიერთობების განვითარების დღევანდელი ტემპის ფონზე, ჩინელ და ქართველ ხალხს შორის კულტურული კავშირის გაძლიერება უაღრესად მნიშვნელოვანია.“