რაბათის ციხის ადმინისტრაციამ პლატფორმა დაიცავი თავისუფლებას კონცერტის ჩატარების ნებართვაში 5 000 ლარის გადახდა დღეს მოსთხოვა. მიზეზად კი დაასახელეს, რომ "ჯგუფი მოთხოვნადია". ჯერ კიდევ გუშინ, დაიცავი თავისუფლება რაბათის ციხის დირექტორთან ილია სიდამონიძესთან ფასსა და პირობებზე შეთანხმებული იყო. სიდამონიძემ თქვა, რომ ადმინისტრაციას დღეს, დაპირებისამებრ, კონტრაქტი უნდა გადმოეგზავნა.
სატელეფონო საუბარში გუშინ რაბათის ციხის დირექტორმა ილია სიდამონიძემ დაიცავი თავისუფლებას წარმომადგენელს უთხრა, რომ ფასი დაახლოებით, 300-500 ლარი იქნებოდა. მისი თქმით, ამაში შედიოდა "სცენა, დალაგება". სიდამონიძის თქმითვე, საღამოს 9 საათამდე თუ დამთავრდებოდა, "300 ლარზე მეტს არ ვიღებთ". აღსანიშნავია, რომ იქამდე, როგორც სიდამონიძე ამბობდა, "თანხის ოდენობას წყვეტს მერია და ქალაქის მერი, ფული შედის მერიაში".
დღეს დაიცავი თავისუფლებას წარმომადგენელი რაბათის ციხის დირექტორმა ილია სიდამონიძემ თავის მოადგილესთან გადაამისამართა და უთხრა, რომ თავად ე.წ ბიულეტენზეა და გადაწყვეტილების მიმღები პირი არ არის. მისი თქმით, "მეგონა, რომ დადებითად გადაწყდებოდა ყველაფერი და ყველაფერი გადაწყვიტეს თვითონ იქ".
ამის შემდეგ, დირექტორის მოადგილემ და დროებით მოვალეობის შემსრულებელმა ნათია ხუციშვილმა სატელეფონო საუბარში თქვა, რომ "ყველაფერს ვწყვეტთ ინდივიდუალურად. მერია არაფერ შუაში არ არის, არავითარი მერია. თანხა შემოდის ჩვენს ანგარიშზე და გეუბნებით, რომ ეს იჯარა დაჯდება 5 000 ლარი".
კითხვაზე, ნებისმიერ ორგანიზაციას ამ ფასს დაუწესებდნენ თუ არა, ნათია ხუციშვილი პასუხობს - "იმდენად მოთხოვნადია თქვენი ჯგუფი, რომ გადავწყვიტეთ, თანხა გაგვეზარდა". მისი თქმით, "სტანდარტული ფასი არ გვაქვს. ბატონმა ილიამ რა გითხრათ, არ ვიცი, არ ბრძანდება ახლა და ჩვენი ბოლო სიტყვა არის ეს".