ერთი წლის მანძილზე ,,რეფორმატორები’’ ვცდილობთ პასუხი მივიღოთ გამოძიებისგან, თუმცა ამ დრომდე მათი მხრიდან რეაგირება არ ყოფილა.
ჩვენ შეგნებულად არ ვაკეთებდით განცხადებას, რომ გამოძიებისთვის ხელი არ შეგვეშალა, თუმცა დღეს დავრწმუნდით, რომ ჩვენს ქვეყანაში კანონიერების დაცვის სხვა გზები არ არსებობს და ხელისუფლება თავისი უმოქმედობით გვაიძულებს შენობებიდან გამოვიდეთ და მათ ქუჩიდან ვესაუბროთ.
ჩვენს ხელთ არსებული ინფორმაციით, პარტიის ყოფილი წევრების წინააღმდეგ გამოძიება რეალურად დასრულებულია, თუმცა პროკურატურა ამჯობინებს უმოქმედობის რეჟიმში ყოფნას, რაც ჩვენი შეფასებით უკვე წარმოადგენს პოლიტიკური გაერთიანება ,,რეფორმატორების’’ წინააღმდეგ მიმართულ არამართლზომიერ ქმედებას, რომელიც თავის მხრივ ხელს უშლის ჩვენი კანონიერი პოლიტიკური საქმიანობის ჯეროვნად განხორციელებას. იმის გათვალისწინებით, რომ პარტია ემზადება მოახლოებულ საპარლამენტო არჩევნებში მონაწილეობის მისაღებად, აღნიშნული საქმე წარმოადგენს არსებითად ხელის შემშლელ გარემოებებს.
მოვითხოვთ, დაუყონებლივ რეაგირებას და საქმის უახლოეს დღეებში დასრულებას, წინააღმდეგ შემთხვევაში, ზემოაღნიშნული უმოქმედობა ჩვენს მიერ შეფასებული იქნება, როგორც პარტიის წინააღმდეგ მიმართული დანაშაული, რომელშიც იკვეთება სახელმწიფო ინსტიტუტების თანამონაწილეობა. პრემიერ–მინისტრს მოვუწოდებ, უმოკლეს დროში გაგვცეს პასუხი, რის გამო იწელება გამოძიება.
მინდა ვკითხო მთავარ პროკურორს, მაშინ, როცა რამდენიმე თვის წინ ბრტყელ–ბრტყელი სიტყვებით თავს გვაწონებდა პარლამენტის დარბაზიდან და გვპირდებოდა გახსნილობას და შეურიგებელ ბრძოლას დანაშაულთან, რა პასუხს გაგვცემს დღეს, რასთან გვაქვს საქმე?
ჩვენ ვართ მნიშვნელოვანი გამოწვევის წინაშე, გვიწევს ბრძოლა არათანაბარ გარემოში და ამას ემატება სახელმწიფო ინსტიტუტების მხრიდან უმოქმედობა და უპასუხისმგებლობა. მოვუწოდებ პრემიერს და მთავარ პროკურორს დაუყონებლივ დაინტერესდნენ „რეფორმატორების“ საქმით და ნუ გახდებიან ჩვენი პარტიის წინააღმდეგ ჩადენილი დანაშაულის და დამნაშავეების თანამონაწილეები.“ - აცხადებს ირაკლი ღლონტი.