თავისუფალ უნივერსიტეტში ჰომოფობიის შესახებ იდენტობას მიერ ორგანიზებული საჯარო ლექცია ვერ ჩატარდა. მიზეზი მოქალაქეთა ჯგუფი გახდა, რომლებიც აცხადებდნენ, რომ მათი მიზანი ლექციის ჩაშლა იყო. ისინი ლგბტ პირების მიმართ ჰომოფობიურ და დისკრიმინაციულ გამონათქვამებს იყენებდნენ.
ლექცია სახელწოდებით „ჰომოფობიის სოციო-კულტურული ასპექტები" ილიას უნივერსიტეტის პროფესორ თათა ცოფურაშვილს უნდა წაიკითხა. დაახლოებით ორი საათის განმავლობაში აუდიტორიაში იმყოფებოდა უნივერსიტეტის ადმინისტრაციის წარმომადგენელიც, თუმცა ლექცია მაინც ვერ შედგა. როგორც თავისუფალ უნივერსიტეტში აცხადებენ, მათ საჯარო ლექციაზე დასწრებასთან დაკავშირებით შეზღუდვა არ აქვთ.
იდენტობის ცნობით, ლექცია პროექტის – “გენდერისა და სექსუალობის საკითხებზე სტუდენტების მგრძნობელობის გაზრდა” – ფარგლებში ტარდებოდა და კანადის მთავრობის მიერ არის მხარდაჭერილი. პროექტი გენდერის და სექსუალობის საკითხებთან დაკავშირებით ადამიანის უფლებების სწავლების, ტოლერანტული საზოგადოების მშენებლობის და ლიბერალური ღირებულებების განმტკიცებისთვის სტუდენტების ინფორმირებას და ამ მხრივ მათი ცნობიერების ამაღლებას ისახავს მიზნად.