საპარლამენტო უმრავლესობის ამჟამინდელმა ლიდერმა, ზვიად კვაჭანტირაძემ სტამბოლში გენერალური კონსულობის პერიოდში, არაფხიზელ მდგომარეობაში, ავტოსაგზაო შემთხვევის დროს, სახელმწიფოს კუთვნილი ავტომობილი დაამტვრია და გადამალა. ინფორმაციას ამის შესახებ ქართული გაზეთი ავრცელებს. გაზეთის მთავარი რედაქტორის, გუგა სულხანიშვილის თქმით, ავტომობილის ღირებულება 16 ათასი დოლარი იყო და დანაკარგის შესახებ მას შემდეგ გახდა ცნობილი, რაც ახალმა კონსულმა ინვენტარიზაცია ჩაატარა.
სულხანიშვილმა ჟურნალისტებს გააცნო თბილისის საქალაქო სასამართლოს განჩინებაც, რომლის მიხედვით, 2013 წლის 7 ოქტომბერს ზვიად კვაჭანტირაძეს საქართველოს საგარეო საქმეთა სამინისტროს ანგარიშზე 16 500 აშშ დოლარის ექვივალენტის ლარში ჩარიცხვა დაეკისრა. დეპუტატს სასამართლომ თანხის გადასახდელად 24 თვიანი ვადა დაუდგინა, რომელიც 2015 წლის ოქტომბერში ამოიწურა.
ამ დრომდე უცნობია გადაიხადა თუ არა დაკისრებული თანხა ზვიად კვაჭანტირაძემ. ქართულის გაზეთის რედაქტორმა შესაბამისი კითხვით საქართველოს საგარეო საქმეთა სამინისტროს და ფინანსთა სამინისტროს სახაზინო სამსახურს 6 იანვარს მიმართა, თუმცა პასუხი ამ დრომდე არ მიუღია.