- საქართველოსთან დღეს არსებული ცალმხრივი სავიზო რეჟიმის შესაძლო გაუქმებაზე რუსეთის პრეზიდენტმა ყოველწლიურ შემაჯამებელ პრესკონფერენციაზე ისაუბრა. ვლადიმირ პუტინის თქმით, მოსკოვი, სირთულეების მიუხედავად, საქართველოს მოქმედი ხელისუფლებისგან სიგნალებს ხედავს.
საქართველოს პრემიერმინისტრი თვლის, რომ რუსეთის პრეზიდენტის დღევანდელი განცხადება საქართველოს მოქალაქეებისთვის სავიზო რეჟიმის შესაძლო გაუქმების შესახებ „სწორი მიმართულებით გადადგმული ნაბიჯია“. პუტინის საპასუხოდ გამოქვეყნებულ განცხადებაში ირაკლი ღარიბაშვილი აღნიშნავს, რომ ქართული ოცნების საგარეო პოლიტიკას „სერიოზული ხელშესახები შედეგები მოაქვს“.
- შეწყალების კომისიის ყოფილი თავმჯდომარე და თბილისის საკრებულოს წევრი ალეკო ელისაშვილი საქართველოს მთავარ პროკურატურაში დაკითხვაზე იმყოფება. როგორც მან ჟურნალისტებს დაკითხვამდე განუცხადა, საგამოძიებო უწყებაში უნდა წარედგინა ამონაწერი მაგთის ოფისიდან, სადაც იკითხება ის მოკლე ტექსტური შეტყობინებები, რომელიც, ელისაშვილის მტკიცებით, მას გაუგზავნეს. შეწყალების კომისიის ყოფილი თავმჯდომარე პროკურატურას უმოქმედობაში ადანაშაულებს.
- პარლამენტის იურიდიულ საკითხთა კომიტეტმა საარჩევნო კანონმდებლობაში დაგეგმილი ცვლილებების კორექტირებულ ვარიანტს მხარი დაუჭირა. პროექტის მეორე მოსმენით განხილვა კამათის ფონზე მიმდინარეობდა. კანონპროექტი საპარლამენტო უმრავლესობის მიერ არის ინიცირებული და მაჟორიტარული საარჩევნო ოლქების თავიდან გადანაწილებას გულისხმობს.