რეგიონული განვითარებისა და ინფრასტრუქტურის სამინისტრომ, ცენტრალურმა საარჩევნო კომისიამ, თბილისის მერიამ და განათლებისა და მეცნიერების სამინისტრომ, არჩევნებში შეზღუდული შესაძლებლობების მქონე პირთა სრულფასოვანი მონაწილეობის უზრუნველსაყოფად ურთიერთთანამშრომლობის მემორანდუმი გააფორმეს.
მემორანდუმს ხელი მოაწერეს რეგიონული განვითარებისა და ინფრასტრუქტურის მინისტრმა ნოდარ ჯავახიშვილმა, ცენტრალური საარჩევნო კომისიის თავმჯდომარემ თამარ ჟვანიამ, თბილისის მერმა დავით ნარმანიამ და განათლებისა და მეცნიერების მინისტრმა თამარ სანიკიძემ.
მემორანდუმზე ხელმოწერით მხარეები შეთანხმდნენ შეასრულონ 2014-2016 წლის სამთავრობო სამოქმედო გეგმით გაწერილი ნორმები - შეზღუდული შესაძლებლობის მქონე პირთა თანაბარი შესაძლებლობების უზრუნველყოფის შესახებ. ამ შეთანხმებით, ისინი ასევე ასრულებენ „გაერთიანებული ერების ორგანიზაციის“ 2006 წლის 13 დეკემბრის შეზღუდული შესაძლებლობის მქონე პირთა უფლებების კონვენციის მე-9 მუხლის (მისაწვდომობა) და 29-ე მუხლის (პოლიტიკურ და საზოგადოებრივ ცხოვრებაში მონაწილეობა) მოთხოვნებს.